L’Unione Italiana, in colaborasiòn con l’Università Popolare de Trieste, e col Patrocinio de la Cità de Buje e de la Region Istriana, publica el
Concorso „Dimela cantando“, 9° edision
per cansoni nove che le sarà sonade e cantade a la 10° edision de ’l
FESTIVAL DELL’ISTROVENETO
Cosa se ga de far?
Ghe vol mandar entro el 19 febrajo 2021 (no esisti proroghe) la canson per posta ‘letrònica a’l indiriso:
cultura@unione-italiana.hr con el tìtolo Dìmela Cantando 2021
Cuando che mandè la canson, gavè de scrìver:
– tìtolo de la canson e chi che la ga scrita
– chi che ga fato la mùzica
– chi che la cantarà
– el testo in formato word
– la registrasion fata in studio bela e pronta, cusì come la ga de eser
Stè ’tenti: Le cansoni che mandè
– le ga de èser scrite in istroveneto
– no le pol èser stade mai publicade, cantade o sonade prima
– no le pol durar più de 3 minuti e mezo (secondo più, secondo meno) Un autor el pol mandar a’l màsimo do cansoni
E cosa femo dopo?
Tute le cansoni che le rivarà per tenpo e che le sarà fate come che scrivi cua sora, le sarà valutade in modo anònimo de una comision fata aposta che ghe ne sielzarà 14 in baze a’l valor artìstico e co’ particolare atension a’l testo.
Cosa che disi la comision, cusì ze e no se se devè rabiar.
Sielte le canson, tuti i autori i sarà informadi de come che ze andade le robe entro el 2 de marzo 2021.
L’organizator el se ciol el dirito de domandarghe a chi che ga scrito el testo de canbiar la parte che no la ze in bon istroveneto e, de conseguensa, de corèzar ’sta roba anca in te la
parte cantada. Stesa roba la val anca per la mùzica e l’arangiamento. In parole pòvere: voi fe’ el vostro mejo, ma se’ d’acordo che cualcosa se pol anca canbiar, se servi, per far più bela la canson.
Cosa ze de novo ancora?
Niente! Anca ‘sta volta niente bazi (muzicali, se capisi) per cantar: le canson le sarà sonade da’l vivo de un’orchestra. Cuesto vol dir che, dopo la selesion, ve contatarà el produtor/capobanda de l’orchestra per capir insieme come sonar ’sta canson a’l mejo.
Come la va ‘vanti la storia?
Ben. Cuando che se se ga meso tuti d’acordo sun tuto (testo, mùzica, arangiamento) e se servirà canbiar cosa, gavaré un poco de tenpo per méter a posto le robe e mandar la canson come che la ga de zguardar per bon.
A i autori de le cansòn che le sarà sielte, ghe refondaremo le speze de incizion de la canson.
Cuando se vedemo dopo?
Cuando che l’orchestra la sarà pronta, se se incontra tuti insieme per far una prova generale. E dopo, come senpre, faremo tre serate. Forsi anca quatro o più. Insoma, vedaremo. Tute le date, come l’órdine de ezibision, ve le faremo saver per tenpo.
Cosa se vinsi?
Le canson le sarà sonade e cantade da’l vivo. Le meje, le vinsarà el premio. Che premio?
Premio de la Giurìa (per la meja canson): 1.000,00 euro; Premio per el mejo testo: 500,00 euro;
Premio per el mejo arangiamento: 500,00 euro.
La giurìa la podarà dar anca fina 3 Mensioni per cualcosa de particolare che merita
(ezecusion, interpretasion …) de 300 euro l’una. Premio de’l pùblico: 1.000,00 euro
Premio de i artisti: sorpreza!
Se scrivi in euro, ma pol èser anca controvalor in kune.
El premio el ghe va a’l autor de’l testo de la canson, dopo sarà lu che el spartisi a chi che ’l vol.
E per finir
I autori i ghe cedi i diriti de autor a’l organizator per ’sta ocazion, ma isteso ghe resta i diriti previsti da la lege.
E sì: chi che partèsipa a ’sto concorso el ze d’acordo co’ tuto cuel che scrivi cuà de sora, anca de èser filmado!
Ve recordemo che l’istroveneto no ’l ze solo ’rimòniche e bei veci tenpi, ansi, pol èser tuto cuel che se vol e, soratuto, sarà apresade cuele cansoni co’ temàtiche e forme muzicali contenporanee … de ancùo insoma.